11 prilli shënon përvjetorin e vdekjes së diktatorit Enver Hoxha. Në rrjetet sociale e jo vetëm mendimet e dhëna për të, janë të ndryshme, ashtu sicc janë të ndryshme edhe mendimet mbi rolin që ai pati në shoqërinë shqiptare. Dy prej tyre “përplasen” sot duke dhënë ide krejt ndryshe prej njëri-tjetrit mbi Hoxhën.
Dritan Hila
Në 9 prill ka vdekur Ahmet Zogu, në 11 prill ka vdekur Enver Hoxha.
Në 8 tetor ka lindur i pari, në 16 i dyti.
Njëri themeloi shtetin, tjetri e bëri të punonte si sahat. Pastaj për të tjerat është bisedë e gjatë. Pa harruar se më kollaj mblidhet një thes me pleshta, sesa bëhen në një mendje 2 shqiptarë.
Kastriot Dervishi:
Për çfarë duhet ta kujtojmë Enver Hoxhën?
Në “përkujtim” të 11 prillit 1985, ditës së vdekjes zyrtare të diktatorit komunist të Shqipërisë, po rendis disa arsye pse emri i tij duhet kujtuar. Ka shumë arsye më tepër se kaq, por unë mendoj se ai duhet kujtuar për:
-Luftën civile të viteve 1943-1944.
-Eksodin e vitit 1944.
-Shkatërrimin e shtetit shqiptar të ndërtuar me aq sakrificë në vitet 1920-1939.
-Përçarjen e madhe midis shqiptarëve nga zhvillimi i luftës së klasave.
-Ndërtimin e shtetit eksperimental sovjetik me tipare klanore dhe krahinore.
-Vrasjen dhe burgosjen e inteligjencies shqiptare të shkolluar nga Perëndim.
-Grabitjen e vjedhjen e 320 tonë flori.
-Grabitjen e individit, pronave dhe sendeve të tjera të paluajtshme
-Bashkimin doganor dhe monetar me Jugosllavinë.
-Izolimin e Shqipërisë nga bota dhe aleancat me armiqtë shekullorë të Shqipërisë.
-Shkatërrimin e natyrës me çpyllëzime, vepra industriale të panevojshme e me humbje financiare dhe ekologjike.
-Gatimi i njeriut të ri internacionalist proletar.
-Burgimet, internimet e persekutimet e popullsisë.
-Shkatërrimin e rrjetit arkivor të vendit dhe pasurisë kulturore të vendit.
-Për urinë dhe rreckosjen që i shkaktoi shqiptarëve si rrallë herë në histori.
-Për dëmet e shumta që asnjë pushtues nuk i shkaktoi vendit sa i shkaktoi regjimi i tij.
-Prapambetjen e thellë në të cilën e la vendin.
(Në foto, dy prej të cilave janë shkrepur më 13.4.1985 kur bëheshin nderimet dhe dy të tjera më 3.5.1992, ditën kur arkivoli i Hoxhës u hoq nga varrezat e dëshmorëve).
