Të enjtet e tetorit në Tiranë këtë vit janë të veçanta. Ato nuk kanë nisur si fundjavat e zakonshme kur njerëzit mblidhen së bashku, pinë diçka dhe diskutojnë për sportin apo politikën. Është fushata e leximit me moton “Takohemi për një liber”, ajo që ka mbledhur njerëzit bashkë duke sjellë në vëmendjen e të gjithëve kënaqësinë që dhurojnë bisedat për librat, për poetët, për shkrimtarët, për vargjet, për botën e letrave.
Mbrëmja e djeshme ishte pikërisht e tillë, jazz, libra dhe verë si kombinimi më i mirë për shpirtin e mendjen.
Takimit të djeshëm veç të rinjëve të apasionuar pas botës së letrave iu bashkuan edhe emra të njohur, siç ishte pedagogu Edon Qesari, i cili lexoi disa poezi të përkthyera prej tij nga autorë të ndryshëm.
Biseda u fokusua tek libri, duke u ndalur veçanërisht tek problematikat që ai ka apo hasen në Shqipëri.
Qesari theksoi se; “fushata e leximit nën moton “Takohemi për një libër” është një nismë jashtëzakonisht e mirë, e cila tenton të shkojë në thelb të problemit që ne kemi me librin; pra nxitja e leximit dhe e kulturës së të lexuarit”.
Gjithashtu ai theksoi se “ bukinistët ( shitësit) e rrugës, duhet të kthehen në një kategori të mbrojtur”, pasi në gjithë vitet e tranzicionit shqiptar, ku shumëkush ka menduar lloj-lloj mënyrash sesi të nxjerrë bukën e gojës, ata kanë qenë të vetmit që i kanë bërë më të hijshme rrugët e qoshet e Tiranës ku gëlojnë kafet e fastfoodet, duke shitur libra, dije.
Në mbrëmjen e leximit, zhvilluar tek Skena Jazz e pranishme ishte edhe Ministrja e Kulturës Mirela Kumabro, e cila lexoi bashkë me të rinjtë e tjerë poezi nga poeti Ndoc Gjetja.
Të rinjtë e tjerë që iu bashkuan mbrëmjes “Takohemi për një libër”, lexuan pjesë nga Remarque, poezi nga i madhi Frederik Rreshpja, pjesë nga Vedat Kokona, Dritero Agolli.
Mbrëmjet me jazz, libra dhe verë do të vijojnë çdo enjte ku të gjithë mund t’i bashkohen eventit duke lexuar pjesë nga autorët e tyre të preferuar.
