ARGJIRIS HIONIS (1943-2011) /
~
Guri që dikush e flaku mbas krahëve dhe një tjetër e mori për të ndërtuar shtëpi
Gurët që bluajnë gjatë natës mendjen, që thërrmojnë ëndrrat dhe kur zgjohesh të nesërmen nuk mban mend gjë tjetër veçse një pluhur të bardhë
Guri themel i sigurisë
Guri që urtësisë i thyen xhamin
Guri mes dhëmbëve
Guri në veshka
Guri në zemër
Guri me një zemër skalitur përsipër
Guri i pashpirt që në duart e skulptorit bëhet bir i ndjeshëm
Guri në qafën e të dëshpëruarit
Guri në këmbën e zhytësit
Guri i thadruar për t’u bërë mur
Guri i rrumbullt për t’u ledhatuar
Guri i paformë për t’u goditur me shkelm
Guri poshtë gushës së Isakut
Guri poshtë gushës së Ifigjenisë
Guri tempull i lyer me gjak njerëzish të pafajshëm a kafshësh edhe më të pafajshme ngaqë njerëz të pafajshëm u duhej të zëvendësonin
Guri i kohës së hyjnive
Guri që e hedh i pari i të pamëkatëve dhe i kthehet në ballë
Guri që godet mëkatarin dhe ky gur gjakos
Guri që e hedh lart dhe bie poshtë
Guri që e hedh lart dhe nuk bie poshtë
Guri i llastiqeve që vret zogun
Guri i llastiqeve që bëhet zog dhe humb largësive
Guri në shkretëtirë
Guri në kopshtin e shkretë japonez
Guri i shkretë në kopshtin e bleruar
Guri ku pengohet i përndjekuri dhe kapet nga ndjekësi
Guri ku pengohet ndjekësi
Guri ku nuk pengohet njeri dhe që sheh duke kaluar të përndjekurin e ndjekësin
Guri që ishte njeri që u ngurtësua
Guri që ishte llavë që u ngurtësua
Guri shujtë e të vdekurve
Guri nënkresë e të vdekurve
Guri mbulojë e të vdekurve
Guri i shpuar dalëngadalë nga shiu
Guri i shkërmoqur befas nga tritoli
Guri në buzët e pusit
Guri në fund të botës
Guri që zuri hënën në ballë e iu derdh gjithë gjaku e s’i mbeti pikë
Gurët që i shkonin pas Orfeut
Gurët që përndiqnin Orfeun
Gurët e çmuar burgosur në kasaforta a mbërthyer nëpër unaza
Gurët e kotë të lëshuar rrugëve
Guri mal dhe vëllai i tij guri kokrrizë rëre
Guri që ti e flak në liqen për të parë rrathët që do vizatojë mbi ujë dhe kështu e ke mbytur përgjithmonë
Guri që vishet nga myshku dhe sheh në ëndërr sikur nxori rrënjë
Shtufi që hiqet sikur është gur por pluskon në ujë
Guri profeci e pashpjegueshme
Guri i nemitur
Guri që foli dikur askush nuk e kuptoi dhe nuk foli më kurrë
~
(përktheu Romeo Çollaku)
