NOUVELLES AVENTURES, workshop nga Lek M Gjeloshi.
“Nouvelles aventures” është titulli i workshopit që do të organizohet në Art House dhe në Galerinë e Arteve Shkodër gjatë muajit Korrik. Workshopi do të drejtohet nga artisti Lek M. Gjeloshi dhe do të ketë karakter kryesisht teorik, temat e të cilit do të trajtojnë momente dhe aspekte të ndryshme të artit bashkëkohor, të mendimit filozofik, të gjuhës dhe të kinematografisë.
Kohëzgjatja e tij konsiston në tre javë të njëpasnjëshme. Secilës prej tyre i përket një temë specifike, për të cilen kërkohet një pjesëmarrje intensive tre ditore. Takimet do të zhvillohen brenda një harku kohor prej 120 – 180 min. (në raste specifike ku përfshihen projeksione filmike).
Thirrja për pjesëmarrje i drejtohet të gjithë studentëve të Universiteteve të Artit, Shkodër e Tiranë, si dhe artistëve të rinj që punojnë e jetojnë aty. Seleksionimi do të bëhet mbi bazën e një portfoli, i cili duhet të përmbajë një përmbledhje të punëve (3-5 punë) dhe një tekst të shkurtër, me karakter përshkrues mbi punën dhe motivues në lidhje me pjesëmarrjen.
Këto materiale, të përmbledhura në një file të vetëm Pdf, mund t’i dërgoni në adresën: lekmart@gmail.com.
Afati përfundimtar i aplikimit është data 25 Qërshor 2016. Të përzgjedhurit do të njoftohen nëpërmjet e-mailit me datë 1 Korrik 2016.
