Nisma studentore “Një shtëpi, një mburojë për trashëgiminë kulturore” organizoi mbrëmjen poetike kushtuar veprës së Gjergj Fishtës.
Të pranishëm në këtë aktivitet ishin shkrimtari dhe poeti i njohur Agron Tufa, shkrimtarja Ana Kove, pedagogë e studentë të shumtë. Agron Tufa vuri në dukje harresën e qëllimshme që ka pësuar vepra e Fishtës, duke thënë se ai i thur vargje shqiptarit me virtytet më të mira dhe me kritika therëse.
Ndërsa shkrimtarja Anrila Spahija (Ana Kove), në nisje të fjalës së saj propozoi lindjen e një profesioni të ri të emërtuar “Fishtolog” për shkak të nevojës për studimin e krijimtarisë së tij ashtu siç duhet. “Kur dëgjoj apo lexoj Fishtën, përballem me një fjalor dhe nivel të atillë të përdorimit të gjuhës sa i them vetes ‘pse shkruan’”, – shprehu Ana Kove vlerësimin e saj për poetikën e Fishtës.
Aktiviteti ishte pjesë e një nisme studentore që synon përjetësimin e veprës së Gjergj Fishtës përmes ndërgjegjësimit publik dhe ngritjes së një muzeu në vendin ku ai lindi.(Vizion)
