Muzeu Kombëtar i Fotografisë “Marubi” është një ndër muzetë e përzgjedhur për European Museum Year Award (EMYA), një ndër çmimet europiane më prestigjoze për muze që kontribuojnë në tërheqjen e audiencës duke i dhënë vizitorëve një atmosferë unike e duke i kushtuar vëmendje të veçantë edukimit të brezave në bashkëndarjen e një përgjegjësie shoqërore në kontekstin ku ata operojnë.
Ceremonia e ndarjes së çmimeve, e cila përkon edhe me 40 vjetorin e EMYA, do të zhvillohet në Zagreb në datat 3-7 maj 2017.
Të vlerësuar nga kjo përzgjedhje që e rendit Muzeun Marubi ndër muzetë më inovativë në Europë, gjejmë rastin të falenderojmë të gjithë partnerët e një misioni të përbashkët për ruajtjen dhe promovimin e kësaj trashëgimie kulturore.
