Limos Dizdari – Artist i Merituar, feston sot 75 vjetorin e lindjes. Që në moshë të vogël ka marrë pjesë në grupet amatore si instrumentist. Kreu studimet e mesme në Liceun Artistik J.Misja në Tiranë për oboe, në vitet 1957-1961 dhe në vitin 1962 ndoqi studimet në konservatorin shtetëror, në degën kompozicion me profesor Çesk Zadeja, nga ku nisi kompozime të zhanreve të ndryshme. Në vitin 1966 punoi një vit në radio Tirana , si redaktor muzike. Në vitin 1967 transferohet në Sarandë ku punon si përgjegjës i Shtëpisë së kulturës , ku dha një kontribut në zgjerimin e aktivitetit artistik të këtij qyteti si drejtues organizues dhe kompozitor. Në vitin 1971 kthehet përsëri në Tiranë dhe punon si kompozitor në profesion të lirë. Ai njihet si kompozitor i mirënjohur si për vepra simfonike ashtu edhe për përpunimin dhe kompozimin e këngëve të muzikës së lehtë mbështetur në traditën popullore shqiptare. Pjesëmarrës në disa festivale të këngës dhe fitues i mjaft çmimeve të para dhe të dyta ku mund të përmendim këngët “ Këputa një gjethe dafine” , “Udhët e atdheut më thërrasin” të vlerësuara me çmime të para. Gjatë viteve 1974 -1982 kalon drejtor muzike në Kinostudio ku kompozon muzikë të shumë filmave si “Malet me blerim mbuluar”, Rrugë të bardha”, “Beni ecën vetë” “Koncert në vitin 1936”, “ Njeriu me top”, Qortimet e vjeshtës” etj. Krijimtaria e Limos Dizdarit është e gjerë dhe e larmishme duke shtuar përveç atyre të përmendura më sipër edhe mjaft këngë për fëmijë, këngë të përpunuara, romanca, korale, sonatë për piano, pjesë instrumentale etj. Në vitin 1988 deri në vitin 1991 ka qënë Drejtor Artistik i Ansamblit të Këngëve dhe Valleve Popullore. Ka qenë Kryetar i Lidhjes së Shkrimtarëve dhe Artistëve të Shqipërisë për dy mandate gjithashtu ka qenë edhe Deputet në Kuvendin Shqiptar (2001-2005). Ai ka themeluar Qendrën e Artit “Dea”, në të cilën në vitin 2007 organizoi Festivalin Ndërkombëtar “Këngët e Tokës”. Për meritat e tij artistike Limoz Dizdari është vlerësuar me titullin “Artist i Merituar”.
