Nga Edvin Kukunja
bukë me sallam dhe novalginë
në ditë më të mira
ndryshe me ujë e sheqer
dhe mbaj barkun me dorë
dhe ti
ti ëndërroje feta buke fluturuese
me kështjella mbi to
dhe filxhanë-kakao-pishinë
ku të notoje mëngjeseve të së djelës
ndërkohë
ndërkohë oborret kredhur
në aromës e kafesë pjekur zjarrit
dhe bluajtur prej duar çupëlinash
kundronin me kërshëri
lirinë tënde prej mashkulli
dhe ti
ti frikë kishe Ishen
flokët fshehur nën shami të bardhë
që lexonte fatet në të mistershmin
llum kafeje mbetur në fund të filxhanit
ndërkohë
ndërkohë feta-buke-avjonë me ujë e sheqer
fluturonin mbi qytetin me shtëpiza-qerpiç
dhe këmbë të zbathura rendnin pas ëndrrës
ëndrrës që të kap prej jakës tani
dhe të qorton me sy vocërraku këmbëzbathur
