Një nga legjendat më të njohura, rikthehet në ekranin e madh të kinemasë pas shumë vitesh. Është “The Legend of Tarzan” që do të shfaqet premierë në kinema Millennium prej datës 7 korrik. Një film me aksion dhe aventurë, bazuar në personazhin e famshëm të krijuar nga Edgar Rice Burroughs dhe mjaft të njohur nga të gjithë. Filmi me regji të David Yates dhe skenar të Adam Cozad e Craig Brewer, ka për protagonist aktorin Alexander Skarsgård.
Në film luajnë edhe aktorët si i fituesi i Oskarit, Samuel L. Jackson (“Pulp Fiction,” “Captain America” films), Margot Robbie (“The Wolf of Wall Street”), i nominuari për Oskar, Djimon Hounsou (“Blood Diamond,” “Gladiator”), i nominuari për Oskar John Hurt (“The Elephant Man,” “Harry Potter” ), me fituesin e Oskarit Jim Broadbent (“Iris”), dhe dy herë fituesin e Oskarit,aktorin Christoph Waltz (“Inglourious Basterds,” “Django Unchained”).
Kanë kaluar shumë vite që kur burri i njohur si Tarzani ka lënë pas xhunglën afrikane për t’u kthyer në jetën londineze me emrin John Clayton III, Lord Greystoke, në krah të gruas së tij të dashur , Jane. Por ai dërgohet në Kongo për të shërbyer si i dërguari i parlamentit ku do të përballet me kapitenin belg Leon Rom, i cili ushtron aktivitete të paligjshme dhe ka ngritur një komplot kundër Tarzanit pa e ditur se cfarë mund të ndodhë.
Aktori Alexander Skarsgård është shprehur se një nga arsyet kryesore që pranoi të bënte këtë rol, ishte që të impresiononte babain e tij. “Ai është një fans i cmendur i Tarzanit. Unë jam rritur me filmat e Johnny Weissmuller. Por ato filma janë 70 -vjecarë dhe unë gjithmonë kam menduar se duhej një film i ri për këtë personazh. Nuk besoj se mund të garoj me Johnny Weissmuller, por doja t’i bëja përshtypje babait tim, i cili ishte shumë më entuziast sesa unë për këtë rol.”- është shprehur aktori i cili ka folur edhe për përpjekjet që i janë dashur të bëjë me qëllim arritjen e fizikut të Tarzanit. “Ishte një sfidë e madhe. Nuk e dija sesi trupi im do të reagonte ndaj ushtrimeve dhe dietës, por ia dola” – ka thënë Skarsgård që kaloi plot katër muaj në trajnim të pandërprerë.
Nga ana e tij regjisori David Yates është shprehur për median e huaj se Skarsgård ka qenë gjithmonë zgjedhja e tij e parë për rolin e Tarzanit që këtë herë është një burrë modern por që vazhdon të ketë muskujt.
Filmi ka filluar të shfaqet në kinematë amerikane prej datës 1 korrik dhe ka arkëtuar në projeksionet e para më shumë se 64 milionë dollarë duke marrë njëherësh edhe vlerësime positive nga kritika.
Skeda e filmit
Titulli: “The Legend of Tarzan”
Regjia: David Yates
Skenari: Adam Cozad, Craig Breëer
Aktorë: Alexander Skarsgård, Samuel L. Jackson , Margot Robbie
Kohëzgjatja: 110 minuta
Gjinia: Aksion, Aventurë
Sinopsi: Tarzan, i cili prej kohësh jeton në Londër vendos të kthehet në shtëpinë e tij të vjetër në xhungël për të hetuar mbi aktivitetet e dyshimta të një kompanie.
