Vdekja në rrethana misterioze e një të riu shqiptar në Greqi, ka trishtuar shumëkënd. Përtej trishtimit e dhimbjes ka pasur edhe opinione se shteti shqiptar nuk po bën aq sa duhet për rastin.
“Meqë disa komentues në këtë faqe, kanë ngritur shqetësimin pse po hesht qeveria për humbjen e jetës së një shtetasi shqiptar në një rajon policie në Athinë, sqarojmë se qeveria jo vetëm nuk ka heshtur, po e ka ndjekur dhe po e ndjek hap pas hapi këtë çështje!”, ka shkruar kryeminsitri Edi Rama në Facebook. Ai jep, deklaratën e plotë që Ministria e Jashtme ka bërë në kohën e duhur për çështjen. “Ministria e Punëve të Jashtme ka ndjekur hap pas hapi nëpermjet të gjitha kanaleve zyrtare rastin tronditës të humbjes së jetës së shtetasit shqiptar P.M. në një rajon policie të Athinës.
Duke u shprehur familjareve ngushëllimet më të ndjera për këtë humbje tragjike, dëshirojmë të informojmë opinionin publik se
Ambasada e Republikës së Shqipërisë në Greqi ka kerkuar nga pala greke bashkëpunimin e menjëhershëm dhe maksimal të të gjitha organeve ligjzbatuese”, shkruan MPJ.
Kjo e fundit vëren se nga kontaktet e deritanishme me autoritetet greke, bëhet e ditur se ekzistojnë pamjet filmike të ngjarjes, si dhe është urdhëruar kryerja e autopsisë mjeko-ligjore.
Ministria e Punëve të Jashtme do të vijojë të ndjek me vëmëndje të veçantë rastin dhe kërkon nga autoritetet greke kryerjen e një hetimi të plotë dhe transparent, në respekt të të drejtave të njeriut dhe standarteve ndërkombëtare.
“Pala shqiptare mbetet në pritje të rezultateve paraprake të hetimit të nisur, dhe bashkëpunimit të plotë të autoriteteve greke, duke rezervuar të gjitha te drejtat për trajtimin e mëtejshëm të rastit.
Ambasada jonë në Athine do të ndjekë në vijimësi këtë çështje në çdo instancë dhe do të vijojë t’i gjendet pranë të afërmve të viktimës.
Deri në zbardhjen e plotë të situatës MPJ fton të respektohet dhimbja e familjareve dhe të mos instrumentalizohet politikisht kjo ngjarje”, e mbyll deklaratën Ministria e Punëve të Jashtme të Shqipërisë
