NGA DATA 31 KORRIK DERI MË 5 GUSHT 2016 DO TË ZHVILLOHET NË KINEMANË E QYTETIT TË POGRADECIT (QENDRA KULTURORE “MITRUSH KUTELI”) EDICIONI I GJASHTË I FESTIVALIT BALLKANIK TË FILMIT DHE KULINARISË (B3F) I ORGANIZUAR NGA SHOQATA ART-IM-PULSE, MBËSHTETUR NGA MINISTRIA E KULTURËS, BASHKIA POGRADEC, RAIFFEISEN BANK DHE QENDRA KOMBËTARE E KINEMATOGRAFISË.
Edicioni i parë i këtij festivali u zhvillua në Pogradec në shtator të 2011. Ai lindi si një dëshirë mes kolegësh në radhë të parë për të njohur krijimtarinë ballkanike në fushën e kinematografisë, një shkollë më vete në traditën e filmit botëror dhe atij europian, të stimulojë kontaktet mes kineastëve të Ballkanit, të cilët në kohët e sotme ndajnë afërsisht të njejtën problematikë sociale dhe kulturore, si edhe të bëjë bashkë njerëz nga vende të ndryshme ballkanike ndër të cilët trysnia e politikave të gabuara, fosileve nacionaliste të ngulitura, e kufijve absurdë dhe e injorancës ka penguar njohjen e ndërsjelltë.
Festivali gjithashtu, brenda mundësive të tij materiale dhe kohore, ka pasur si objektiv edhe nxitjen e marrëdhënieve ndërkulturore mes popujve që jetojnë në kufij të përbashkët dhe prezantimin në një shkallë sa më të madhe të mundëshme të resurseve turistike të zonës Pogradec-Korçë duke nxitur edhe aktivitete në fushën e zejtarisë tradicionale dhe kulinarisë krejt të veçantë.
Në të gjitha rastet B3F ka pasur në qendër të vëmendjes forcat lokale krijuese. Ekspozita, juri vendase, pjesëmarrja aktive e të rinjve vendas në të, kanë bërë që B3F të jetë tashmë një pjesë e pandarë e jetës kulturore të Pogradecit.
Për pesë vjet me radhë festivali B3F është zhvilluar në javën e parë të shtatorit. E reja e këtij edicioni është që zhvillohet në javën e parë të gushtiti, pikërisht në kulmin e sezonit turistik në Pogradec, nga ku pritet edhe një pjesmarrje më e gjerë, jo vetëm nga banorët e Pogradecit, por edhe nga pushues të shumtë nga vendi dhe të huaj.
Në edicionin e këtij viti janë në konkurim afër 100 filma nga të gjithë vendet e Ballkanit. Jashtë konkurimit janë edhe 50 të tjerë. Pjesmarrës në festival janë disa nga figurat më të spikatura të kinematografisë shqiptare si: Reshat Arbana, Mirush Kabashi, Robert Ndrenika, Pirro Milkani, Ndriçim Xhepa, Guljejm Radoja, Tinka Kurti, Dhimitër dhe Roza Anagnosti, Niko Kanxheri, Esat Musliu, Saimir Kumbaro, Xhevdet Ferri etj.
Presidente nderi e Festivalit është Margarita Xhepa. Juria e festivalit është e përbërë nga pesë anëtarë, të gjithë autoritete në fushën e kinematografisë, dhe të gjithë joballkanikë. Këtyre u takon verdikti i fundit i ndarjes së çmimeve.
Festivali do të shoqërohet edhe me disa aktivitete të tjera:
Çdo natë në kinemanë verore pranë Galerisë së Arteve do të shfaqen filma me protagonist aktorin e shquar shqiptar Bekim Fehmiu në nderim të 80-vjetorit të tij të lindjes.
Në bashkëpunim me UNESCO një grup kineastësh të rinj do punojnë në një projekt të veçantë, i cili ka për qëllim që, nëpërmjet videdokumentarëve, të evidentojë vlerat ende pak të njohura turistike të zonës. Punimet e tyre do shfaqen në natën e fundit duke u ndarë çmime për punimet më të mira.
Një koloni piktorësh, studentë të Akademisë së Arteve në Tiranë, nën drejtimin e prof. Vladimir Myrtezaj-Groshi do të punojë përgjatë një jave duke realizuar peisazhe nga Pogradeci. Këto punë do të ekspozohen në galerinë e qytetit natën e fundit.
Në odeonin e qytetit, në një ekran të madh, do të shfaqen çdo natë filma shqiptarë të tipit komedi.
Një ekspozitë pikture nga autorët Anastas Kostandini dhe Arben Theodhosi do të jetë e hapur në galerinë e qytetit përgjatë gjithë ditëve të festivalit.
