Dikur
Kur numëroja psherëtimat
fustanë basme vajzërie mbaja,
gjer i grisja,
në yje kërkoja
“fajin” që nuk e njihja.
Tani fustanet e paveshur ankohen,
si “fajet”… s’pata kur t’i vishja.
Këto vargje janë shkëputur nga libri më i ri me poezi i poetes Flutura Açka. “Ftesë për flirt” titullohet botimi që do jetë së shpejti në duart e lexuesve me vargje sensuale të shkruara ndër vite dhe të tjera të shkuara së fundmi. Vetë poetja e ka zgjedhur këtë lajm si përshëndetjen e parë të këtij viti. Pyetjes a shkruan poezi, ajo i është përgjigjur gjithëhere: “Po, shkruaj, por i hedh rrotull, s’di se ku, nëpër rrëmujën time të letrave. Sa poezi mbase do të mbesin harruar nëpër blloqëza. Këtë fat mund të kenë edhe tregimet e mia; ngaqë poezinë dhe tregimin e shkruaj me dorë”. Këtë herë ajo ka vendosur t’i kthehet dashurisë së saj të parë. “Nuk është aq pa drojë kjo tufë poezish të përmbledhura në këte libër që do ta prezantoj së shpejti”- lajmëron poetja, duke shtuar se poezia është aq e brishtë dhe aq “e pabindur”, sa ç’është edhe e paqtë. “Të jesh lexues poezie, është fat, sepse jo të gjithë janë. Por të jesh autor poezish, është bekim. Çfarë do të na mbesë nga kjo rrekje? Kur shkruajmë poezi, nuk e mendojmë, sepse shkruajmë siç ndiejmë”.
Flutura Açka është shumë e njohur me poezinë e saj. Në vitin 1997 ajo mori çmimin ndërkombëtar “Lira e Strugës” në Netët e Poezisë Strugane ku e ka përfaqësuar poezinë shqipe për disa vite. Në vitin 1998 u zgjodh ndër 13 poetët më të mirë evropianë të gjeneratës së re në konkurrimin për çmimin e madh Tivoli-Europa në Itali. Përfaqësohet me poezitë e saj në pjesën më të madhe të antologjive të poezisë shqipe në gjuhë të huaj dhe poezi dhe cikle të saj janë botuar në shumë gjuhë. Edhe proza e saj po tërheq gjithnjë e më shumë vëmendje, edhe jashtë vendit. Romani i saj Vetmi gruaje është përkthyer në gjuhen bullgare nga Viktor Genkov. Ndërkaq ajo është autore e “Kukullat nuk kanë Atdhe”, “Kryqi i harresës”, “Hiri”, “Lutje dimri” dhe “Zbathur”.
