Shkrimtari i mirënjohur Bashkim Hoxha në bashkëpunim me regjisorin Herion Mustafaraj sjellin këtë fundvit në skenat e Teatrove një komedi bashkëkohore të titulluar “ Grepi i Artë”
“Grepi i Artë” po përgatitet shfaqet për publikun e Tiranës në datat 27-28-29-30 nëntor dhe 3-4-5 Dhjetor në Sallën e Liceut Artistik “Tonin Harapi”.
Më pas në qytetin e Durrësit në Teatrin “Aleksander Moisiu” në datat 16-18-19 dhjetor për të vijuar më pas në teatrot e qyteteve si Shkodra, Elbasani, Fieri, Vlora, Korca e madje përtej kufijve shqiptar vitin e ardhshëm.
Bashkim Hoxha njihet për humorin e tij fin të shenjëstruar ndaj fenomeneve shoqërore të realitetit shqiptar trajton në këtë komedi një temë aktuale e mjaft shpirtërore. Nëpërmjet karakterit mjaft të spikatur të një dedektivi privat, një politikani e gruas së tij, një këngëtareje e të dashurin e saj dhe një parukiere spiune, ai prek temën e marrëdhënieve sociale e familjare duke goditur edhe korrupsionin në ndërgjegjen e këtyre karaktereve që bien preh e një rrjete merimange të pashmangshme shoqërore.
Këtë temë të rëndësishme komedia e trajton përmes historisë njerëzore të ngatërresave, situatave komike, përmes figurave të spikatura, vizatuar me mjeshtëri dhe dialogut që dallohet për humor koherent e nga ku pa kuptuar del një mesazhi i madh: “ Nuk ka rëndësi kush je e nga vjen, në një moment të jetës ti kërkon dashurinë e një njeriu tjetër ta kesh pranë”
Inskenimi i kësaj komedie do të jetë një sfidë ndaj veseve të shoqërisë sonë që hasim rëndom ×në jeten e përditshme. Problematika e personazhet e saj, intepretimi realist i aktorëve, i ndërthurur me grotesken teatrale, do ta bëjnë atë të komunikueshme me publikun, duke sjell me këtë projekt një komedi popullore.
Një vend të rëndësisëm në këte shfaqje zëne numrat muzikor .
Me regjinë e Herion Mustafarait që interpreton dhe vete në këtë komedi dhe një grupi aktorësh të përzgjedhur si, Marjana Kondi, Natasha Sela, Genc Lleshi, Orena Bici, Kevin Rrapaj, kjo komedi do të pasurojë jetën artistike në kryeqytet dhe do të sjelli një kontribut të rëndësishhmë edhe në repertorin e dramturgjisë shqiptare.
Le të njihemi me disa disa detaje të tjera të kësaj komedia me Regjisorit dhe Aktorin Harion Mustafarai:
Herion si lindi bashkëpunimi me autorin Bashkim Hoxha?
Me Z. Bashkim u njoha vite më parë kur drejtonte Teatrin “Aleksandër Moisiu” Durrës. Unë në atë kohë shëtisja nëpër Shqipëri shfaqjen “Sex-therapy në Kryeqytet” , një komedi muzikore e shkruajtur nga unë. Z. Hoxha me ndihmoj me shumë dashamirësi ta prezantoja këtë shfaqje para publikut të Durrësit dhe u kujdes të ishte një sukses. Jam një ndjekës i rregullt i veprave të tij letrare dhe intrigohem nga fakti që ai e njeh kaq mirë realitetin shqiptar e gjithmonë vjen me gjetje aq të veçanta e plot humor. Dua të kujtoj komedinë e tij “Tag” që pati aq sukses në venie të ndryshme skenike si brenda dhe jashtë vendit duke nisur me Teatrin Kombëtar. Z. Bashkim pasi me njohu me komedinë “Grepi i Artë” nëpërmjet sugjerimit të mikut tonë të përbashkët aktorit Ervin Doko, ma besoi mua e regjinë skenike. Shpresoj që me punën time të shpërblej këtë besim të tij, përkrahjen institucionale të Bashkisë Tiranë, si dhe me sponsorat si “Buy to America” e mjaft biznese të tjera që përkrahin artin e nuk kursehen të ndihmojnë me ate çka munden, që publiku të argetohet në këto festa fundviti.
Kësaj radhe vjen dhe si regjisor dhe si aktor në shfaqje, çfarë sfidash kanë këto dy kostume njëherësh.
Kjo nuk është hera e parë për mua që angazhohem në 2-3 detyra brenda produksionit. Sekreti i vetëm është bashkpunimi me artistë dhe ekip që besojnë në projekt dhe vlerësojnë mjeshtrinë e gjithsecilit duke kontribuar me shpirt që shfaqja të jetë një sukses. Puna e sinqertë dhe e ndershme, mundimi, përpjekjet dhe sakrificat janë e vetmja gjë që nuk e humbin kurrë vlerën. Besoj që sa me i angazhuar të jesh në një projekt, aq me solid projekti vjen pasi merr çdo gjë një ngjyrë të përbashkët e sjell një stil unik.
Si u përzgjodhen aktorët, shohim që është një miks i disa brezave, ka qenë e qëllimshme kjo nga ana jote?
Një nga vlerat e kësaj komedie është përballja e brezave, mentaliteteve të tyre dhe forca e bashkjetesës me brezat. Për këtë arsye mendova që duhet të kemi 2 breza aktorësh. Brezi i vjetër i karaktereve, portretizohet nga unë, Marjana Kondi dhe Natasha Sela e loja jonë është me groteske sesa ajo e brezit të ri që portretizohen nga Genc Lleshi, Orena Bici dhe Kevin Rrapaj. Edhe pse këta të fundit janë aktor të njohur humori ne spektaklet televizive, spektatori do shohi një vertetësi karakteresh tek ata. Ata luajnë dramën e tyre, pra mendoj që kjo qasje do jetë një risi si për ta dhe për spektatorin.
Në pjesët e tua nuk mungon dhe elementi i muzikës a ka performanca muzikore pjesa?
Pa dyshim. Unë jam një fanatik i elementit muzikor në një shfaqje teatrale, aq më teper kur muzika është e domosdoshme pasi një nga karakteret e shfaqjes është Meri – Kengetarja. Emocioni dhe rritmi që sjellin numrat muzikorë të ndërtuar nga tekniku i zërit Julian Melani si dhe performancat muzikore do e bëjnë shfaqjen të ketë një ngjyrë të një Show ku nuk do mungoj dhe kërcimi midis personazheve sipas karaktereve që kanë dhe kënga që do i shoqëroj. Larmia skenike pasurohet nga skenografia konvencionale moderne e Robin Tartarit, si dhe nga kostumet të stilizuara nga Zajmira Qeraxhiu. Dua të falenderoj Endrin Hajdinin që më asiston në aspektin teknik dhe aktorial kur nevojitet. Për tu vlerësuar është puna e producentes Elkjana Gjipali që me pasionin dhe profesionalizmin e saj bëri të mundur kapërcimin e disa vështirësive të kësaj shfaqe për të shkuar tek publiku.
Pse duhet ta shikojne shfaqen Grepi i Arte?
Janë njëmijë arsye. Po përmend tre më të thjeshtat. Argëtim, mesazh, magji skenike.
Ju falenderoj për intervistën e dua të theksoj se për arsye të masave kundër Covid-19, pjesëmarrja në sallë do jetë e limituar e me e shumta do behet nëpërmjet rezervimeve. Pra, rezervoni bileten tuaj , përdorni maska dhe përkrahni Artin .
