Nga Alisa Velaj
Mendimi se të humba
M’u shfaq sonte në ëndërr Ares.
Një flakë rrekej të përpinte
Një Krisht të kryqëzuar
Dhe unë e tmerruar në një dhomë pa çati
U shmangesha lakuriqëve që përplaseshin pas mureve.
Qe aq i thellë pikëllimi im Ares
Sa brofa prej ëndrrës me një shkundullimë.
Jashtë tjegullat e çative fluturonin prej erës
E lakuriqët e natës dergjeshin në oborr
Si pas betejës ushtarët e Pirros.
Më mirë që s’u shfaqe në atë katrahurë
Do të ishe krejt i tepërt Ares…
